Ilisimannittutut oqaluttuanik tunniussinissamik kaammattuut: Suliassaqarfimmi suliallit Kalaallit Nunaanni piffissami 1960-imiit 1991-imut naartunaveersaatinut tunngatillugu suleriaatsit atorneqartut pillugit nammineq misilittagaqarfigalugit ilisimannittut
Piffissami 1960-imiit 1991-imut naartunaveersaatinut tunngatillugu suleriaaserineqarsimasoq Kalaallit Nunaanni peqqinnissaqarfimmi imaluunniit ilinniartitaanermut tunngasutigut, imaluunniit Danmarkimi kalaallinut niviarsiaqqanut aamma arnanut naartunaveersaatinut tunngasutigut suleriaaserineqarsimasoq pillugit misilittagaqarpit? Taava tusagaqarfigerusuppatsigit.
Kalaallit Nunaanni piffissami 1960-miit 1991-i tikillugu ”spiralilersuisimaneq” aamma naartunaveersaatinut tunngatillugu suleriaatsit atorneqarsimasut pillugit suliamut attuumassuteqanngitsunit qulaajaanermik aallartitsisoqassasoq danskit naalakkersuisui aamma Naalakkersuisut isumaqatigiipput.
Taamaattumik ilisimatusartoqatigiinnik qulaajaanermik maanna suliaqartoqarpoq, suliassaqarfimmilu sulialinnik, tassunga ilanngullugit nakorsanik aamma peqqinnissaqarfimmi- aamma ilinniartitaanerup iluani sulialinnik, piffissami 1960-imiit 1991-imut naartunaveersaatinut tunngatillugu suleriaatsimik toqqaannartumik imaluunniit toqqaannanngitsumik ilisimasalinnik peqatiserinnilluta.
Suliamut attuumassuteqanngitsunit qulaajaaneq makkuninnga qulaajaaffiussaaq:
- Naartunaveersaatinut tunngatillugu piffissami 1960-imiit 1991-i ilanngullugu suleriaatsip oqaluttuassartaa.
- Spiralit aamma naartunaveersaatit allat atorneqalernissaannik kingunilimmik aalajangiinerup ingerlasimanera.
- Suliap Kalaallit Nunaanni, aamma kalaallinut niviarsiaqqanut Danmarkimi efterskolertunut ingerlanneqarsimanera.
- Ilisimannittutut oqaluttuat aqqutigalugit kalaallit niviarsiaqqat aamma arnat misigisimasaat.
- Suliassaqarfimmi suliallit sulinerminni tunngavissaat, kiisalu piffissami tassani naartunaveersaatinut tunngatillugu suleriaatsimut tunngatillugu misigisimasaat.
- Piffissami tassani inatsisitigut, allaffissornikkut aamma peqqinnissakkut sullissinermi tunngaviit.
Qulaajaanermut tapertaanissat soqutigukku qinnuigissavatsigit mailimut: Qulaajaaneq@nanoq.gl-imut imaluunniit oqarasuaatitsinnut nammineq akisartumut sianerlutit attaveqarfigeqqulluta.
Kalaallit Nunaanni nujaqaruit akeqanngitsumik uunga sianerlutit attaveqarfigisinnaavatsigut + 299 80 11 30.
Danmarkimi najugaqaruit akigititanik nalinginnaasumik akiliillutit oqarasuaammut uunga attaveqarfigisinnaavatsigut +45 65 50 76 74.
Paasissutissat tamakkerlutik mianeralugit suliarineqassapput.
Qulaajaaneq 2025-imi maajip naanerani naammassineqassasoq naatsorsuutigineqarpoq.
Suliniut Syddansk Universitetimi Innuttaasut Peqqissusiannik Ilisimatusarfik suleqatigalugu Ilisimatusarfimmi Issittumi Atugarissaarneq pillugu Ilisimatusarfimmit aqunneqarpoq. Ilisimatusartoqatigiit qulaajaanermik suliallit, kiisalu suliassamut nassuiaat aamma tunuliaqutaq uani annertunerusumik paasisaqarfigisinnaavatit https://da.uni.gl/forskning/udredning/